सांगली, दि. 8 जानेवारी 2024: सांगली लोकसभा मतदारसंघावरुन काँग्रेस आणि भाजपमधील नेत्यांमध्ये जुगलबंदी सुरूच आहे. काँग्रेसचे प्रदेश उपाध्यक्ष विशाल पाटील आणि भाजपचे खासदार संजय पाटील यांच्यात पत्रकार दिनाच्या कार्यक्रमापूर्वी पत्रकारांच्या उपस्थितीत ही जुगलबंदी रंगली.
खासदार पाटील यांनी काही दिवसांपूर्वी विशाल पाटील यांना लक्ष्य करताना म्हटले होते की, "विशाल पाटील मैदानातून दूर का पळत आहेत?" यावर विशाल पाटील यांनी आज थेट प्रत्युत्तर दिले. ते म्हणाले, "मी लोकसभा निवडणुकीच्या मैदानात गेल्या वेळी होतो. यावेळीही मी असणार आहे. मात्र ते असणार आहेत का त्यांना खात्री नसल्यानेच ते अशी वक्तव्ये करीत असावेत."
विशाल पाटील यांनी आणखी म्हटले की, "भाजपचे सर्व्हे सुरु आहेत. त्यात सांगलीची जागा धोक्यात असल्याचे स्पष्ट झाले आहे. त्यामुळे याचा खासदारांनाही अंदाज आला आहे. त्यामुळे ते आता पळायला लागले आहेत. खासदारकी राहिली बाजूला किमान तासगाव- कवठेमहांकाळची आमदारकी तरी मिळावी यासाठी त्यांची धडपड सुरु असावी. विविध वक्तव्ये करून कोणत्याही कारणाने चर्चेत त्यांना राहायचे असावे."
खासदार पाटील यांच्या टीकेला उत्तर का देत नाही, असे पत्रकारांनी विशाल पाटील यांना विचारले असता ते म्हणाले, "मी माझ्या कामावर लक्ष केंद्रित करत आहे. टीकेला उत्तर देण्यासाठी मी वेळ घालवणार नाही. मी लवकरच माझी निवडणुकीबाबतची भूमिका जाहीर करेन."
यावेळी, राष्ट्रवादी काँग्रेसचे जिल्हाध्यक्ष चंद्रकांत जगताप यांनीही पत्रकारांशी संवाद साधला. ते म्हणाले, "सांगली लोकसभा मतदारसंघ राष्ट्रवादी काँग्रेसला हवा आहे. आमच्या पक्षाने हा मतदारसंघ मागितला आहे. पक्षातील वरिष्ठ नेते याबाबत अंतिम निर्णय घेतील."
.jpg)
