पिढ्यान् पिढ्या दुष्काळी राहिलेल्या आटपाडी तालुक्यातील शेतकऱ्यांना टेंभू योजनेच्या पाण्यामुळे आता चांगले दिवस आले आहेत. मात्र, हा विकास खऱ्या अर्थाने प्रगतिपथावर नेणारा ठरू शकेल, यासाठी दूरगामी नियोजन करणे आवश्यक आहे.
टेंभूचे पाणी वाटप करताना बंदिस्त पाईपलाईनची कामे तातडीने होणे आवश्यक आहे. तसेच टेंभू योजनेची आवर्तने निश्चित झाल्यास पाण्याचा वापर अधिक कार्यक्षम होईल. कृषी क्षेत्रातील जाणकारांकडून पीक पॅटर्न ठरवणेही महत्त्वाचे आहे.शेतीमध्ये डाळिंब हे हुकमी पीक असले तरी, कापसाचे उत्पादन वाढवणेही आवश्यक आहे. डाळिंब संशोधन केंद्र आटपाडीत झाल्यास हा तालुका तसेच सांगोला तालुक्यासाठी मार्गदर्शक ठरेल.
आटपाडी तालुक्याच्या भौगोलिक क्षेत्रामुळे येथे शेळ्या-मेंढ्यांचे संवर्धन करण्यासाठी मोठी संधी आहे. विकास सोसायटीच्या माध्यमातून शेळ्या-मेंढ्यांच्या खरेदीसाठी कर्ज पुरवठा करताना जाचक अटी दूर करून सुलभ कर्ज पुरवठा केल्यास शेळ्या-मेंढ्यांची संख्या वाढेल. मांस प्रक्रिया अगर मांस निर्यात केंद्र स्थापन झाल्यासही शेतकऱ्यांना फायदा होईल.शेतकऱ्यांसाठी सोलरवर विद्युत पंप तसेच घरगुती वीज तयार करण्यासाठी विशेष सवलती देऊन सौरऊर्जेचा लाभ दिल्यास शेतकऱ्यांचे जीवनमान उंचावेल.
तालुक्याच्या पूर्व भागात औद्योगिक विकास झाला असला तरी, पश्चिम भागात औद्योगिक विकास होणे आवश्यक आहे. त्यासाठी औद्योगिक विकास महामंडळ स्थापन करणे आवश्यक आहे.आटपाडी तालुक्याच्या पश्चिम भागात डोंगररांगा आहेत. या डोंगररांगांमध्ये डोंगरी वनस्पती आणि वन्यजीव आहेत. डोंगरी विकास योजनेत या डोंगररांगेच्या आसपासच्या गावांचा समावेश करणे आवश्यक आहे.तालुक्यात उभ्या शिक्षणाची सोय नसल्याने विद्यार्थ्यांना दुसऱ्या तालुक्यांची वाट धरावी लागते. वैद्यकीय, कायदेविषयक तसेच इंजिनिअरिंगमधील उभ्या शिक्षणाची सोय या तालुक्याला मिळणे आवश्यक आहे.
साहित्य क्षेत्रात आटपाडी तालुका तीन साहित्य संमेलनांचे अध्यक्ष देणारा आहे. महाकवी ग. दि. माडगूळकर, व्यंकटेश तात्या माडगूळकर आणि शंकरराव खरात या साहित्यिकांनी आटपाडीचे नाव जगभर नेले. ग. दि. माडगूळकर यांचे स्मारक शेटफळे येथे उभारण्यात आले आहे, मात्र व्यंकटेश तात्या आणि शंकरराव खरात यांचे स्मारक होणेही गरजेचे आहे.
एकूणच, टेंभू योजनेमुळे आटपाडी तालुका प्रगतिपथावर उभा आहे. मात्र, दूरगामी नियोजन केल्यास हा तालुका निश्चितच अभिमानास्पद कामगिरी करेल.
.jpeg)
