सांगलीत साहित्यिक सय्यद अमीन यांना अभिवादन

सांगलीत साहित्यिक सय्यद अमीन यांना अभिवादन 

सांगलीचे पहिले आमदार व प्रसिद्ध साहित्यिक सय्यद अमीन यांच्या पन्नासाव्या स्मृतिदिनानिमित्त सांगली येथे त्यांना अभिवादन करण्यात आले. या कार्यक्रमामध्ये डॉ. दिलीप शिंदे हे प्रमुख पाहुणे तर ज्येष्ठ साहित्यिक प्रा. वसंत केशव पाटील हे अध्यक्षस्थानी होते.यावेळी बोलताना डॉ. शिंदे म्हणाले, लेखक आणि कार्यकर्ता असणे एकमेकांना किती पूरक असते याचे आदर्श उदाहरण म्हणजे सय्यद अमीन यांचे आहे.

सय्यद अमीन यांची १६ पुस्तके प्रसिद्ध झाली यामध्ये त्यांनी महंमद पैगंबर, महापुरुष छत्रपती शिवाजी, अबला कादंबरी अशी दर्जेदार पुस्तके प्रसिद्ध केली. त्यांच्या लेखनाच्या माध्यमातून त्यांनी हिंदू - मुस्लिम ऐक्यासाठी विशेष प्रयत्न केले. महाविद्यालयीन शिक्षण संपल्यानंतर त्यांनी स्वातंत्र्य चळवळीत सहभाग घेतला होता. तसेच वसंतदादा पाटील,स्वामी रामानंद भारती वि. स. पागे, यांच्या नेतृत्वाखाली त्यांनी काम केले होते. त्यांनी सांगली - मिरज सिटी बसचा प्रस्ताव महामंडळाकडे त्यांच्या कार्यकाळात सादर करून अंमलात आणला होता.